• الرئيسية
• البيان tv

فتحت الفنانة أسما شريف منير قلبها لجمهورها، وروت واحدة من أصعب الفترات النفسية اللي مرت بيها بعد ارتدائها الحجاب، كاشفة عن صراع داخلي قاسٍ بين الإيمان والشك، وبين الرضا والوجع، في منشور مؤثر عبر حسابها على موقع «إنستغرام».

أسما أوضحت إن المرحلة الأخيرة كانت مليانة ضيق وكرب غير مفهوم، مشيرة إلى إن الرزق اتأخر، والمشاكل زادت، والشكوك بدأت تتسلل لعقلها بهدوء، لدرجة إن الشيطان حاول يقنعها إن التزامها الديني هو السبب المباشر لكل الأزمات اللي بتواجهها، وهو ما خلّاها تدخل في حالة من الارتباك النفسي والتساؤلات الصعبة عن إيمانها.

وأكدت إنها عاشت لحظات ضعف حقيقي، بدأت فيها تشك في نفسها وفي الطريق اللي اختارته، لكن رجوعها لربنا كان نقطة التحول الفاصلة، حيث اكتشفت إن الابتلاء مش عقاب، لكنه جزء أصيل من طريق المؤمن، بل دليل على القرب من الله، مستشهدة بأن الأنبياء أنفسهم مرّوا بأشد الاختبارات.

وأضافت أن ربنا أعاد ترتيب رؤيتها للحياة بشكل غير متوقع، وبدأت تشوف الناس على حقيقتهم، وتفهم إن اللي باين إن حياته مستقرة وسهلة مش شرط يكون على حق أو في راحة حقيقية، مؤكدة إنها لاحظت علامات طمأنينة حوالين قلبها، وإحساس إن في ناس بتدعي لها، وإن ربنا بيطبطب عليها رغم استمرار الألم.

وتابعت أسما برسالة مليانة وعي وإيمان، قائلة إن الوجع ممكن يفضل موجود، لكن وعد ربنا إن «مع العسر يسرا» دايمًا حاضر، مشيرة إلى إننا أحيانًا بننسى إن الدنيا مش الهدف الأساسي، لكنها مجرد اختبار لصبرنا وتسليمنا، وإن التركيز الحقيقي لازم يكون على الآخرة.

واختتمت حديثها برسالة إنسانية لكل اللي بيمروا بظروف صعبة، مؤكدة إن وجود الابتلاء معناه إن ربنا لسه عايزنا، وإن الحياة لو فضلت وردية طول الوقت لازم نقلق، لأن الامتحان جزء من الرحلة، داعية جمهورها للدعاء لها، ومختتمة كلامها بعبارة: «الحمد لله دائمًا وأبدًا».