طاقتك بتخلص وإنتِ مش واخدة بالك.. علامات خفية للإرهاق العاطفي لا يجوز تجاهلها

الأربعاء 7 يناير 2026 04:39 مـ 18 رجب 1447 ^هـ

في أيام كتير تصحي من النوم من غير أي مرض واضح، لا وجع راس ولا سخونية، لكن الإحساس العام تقيل… تقيل على القلب قبل الجسد. تؤدي كل اللي عليكِ، تضحكي، تشتغلي، تتكلمي، لكن من جواكِ حاسة إنك فاضية، مستنزفة، وكأن الحياة بقت أكبر من قدرتك على الاحتمال.

ده مش كسل، ومش دلع، ومش ضعف… دي حالة اسمها الإرهاق العاطفي.

ما هو الإرهاق العاطفي؟

الإرهاق العاطفي هو استنزاف نفسي بيحصل بسبب ضغوط متراكمة: مسؤوليات، علاقات، عمل، توقعات لا تنتهي. الخطر الحقيقي إنه ما بيظهرش فجأة، لكنه يتسلل بهدوء لحد ما تتعودي عليه وتفتكريه طبيعي، وهو في الحقيقة إنذار.

كيف يبدأ دون أن تنتبهي؟

غالبًا يبدأ بتعب بسيط، بعدها يختفي الشغف، ثم تتحول المشاعر إلى لا مبالاة. الأشياء اللي كانت بتسعدك بقت عادية، الكلام بقى مرهق، وأبسط القرارات بقت عبء. تحسي إنك مطالبة دايمًا تكوني قوية، شايلة الكل، ومفيش حد شايفك أو سامعك.

والمرأة أكتر عرضة للإرهاق العاطفي، لأنها بتعيش أدوار كتير في نفس الوقت: أم، زوجة، موظفة، ابنة، وأحيانًا المعيلة. ومع ضغط المجتمع، العطاء بيبقى مطلوب من غير أي مساحة للراحة.

أعراض واضحة… لكن يتم تجاهلها

الإرهاق العاطفي مش إحساس نفسي بس، ده بيظهر على الجسد كمان، ومن علاماته:

تعب مستمر حتى بعد النوم

عصبية أو حساسية زيادة عن اللزوم

صداع وآلام معدة متكررة

فقدان الحماس لأي شيء

رغبة في العزلة والبعد عن الناس

شعور بالذنب لمجرد التفكير في الراحة

تجاهل الأعراض دي لفترة طويلة ممكن يحول الإرهاق العاطفي إلى اكتئاب صامت.

لماذا أصبح الإرهاق العاطفي شائعًا؟

إيقاع الحياة السريع، المقارنات المستمرة على السوشيال ميديا، ضغط العمل، قلة الدعم النفسي، والتربية على التحمل والصبر حتى الإنهاك. إحنا ما اتعلمناش نحط حدود، اتعلمنا نرضي الجميع حتى نخسر نفسنا.