محمد سامي يفجرها: “على جثتي أرجع لنفس الدوامة.. ومش ندمان على ولا كلمة قلتها”
أكد المخرج محمد سامي أنه متمسك بتصريحاته السابقة التي أثارت الجدل حول كل من اختلف معهم في الوسط الفني، موضحًا أنه لم يكن يقصد الإهانة بقدر ما كان يعبر عن رؤيته للنجاح والعمل الجاد، قائلاً: "أنا مش هغيّر كلامي، فعلاً كل اللي اختلفت معاهم في الشغل كانوا فاشلين لأنهم مقصّرين، وأنا عندي إصرار رهيب على النجاح. بس ده مش معناه إني دايمًا على حق، بس عمري ما اختلفت مع حد إلا لو كان مقصّر".
وأضاف خلال لقائه في برنامج "الصورة" مع الإعلامية لميس الحديدي على شاشة "النهار": "الناس عندها حق تقول إني صعب، فعلاً أنا صعب لأن عندي انضباط اتربيت عليه. أمي كانت تربوية وعلمتني الاجتهاد والمذاكرة، فبقيت باخد الشغل بجدية شديدة، ولما بشوف تراخي أو استسهال بيتعبني جدًا".
واعترف سامي أنه يدرك جيدًا عيوب شخصيته، قائلاً: "أنا بني آدم عندي مشاكل، مش بعرف أعبر صح، ولو اتعصبت ممكن أغلط من غير قصد، بس عمري ما كان هدفي أضايق حد".
وتحدث عن تطوره الفني، موضحًا أنه لم يعد يبحث عن “الخلطة” التي اشتهر بها في الدراما الشعبية، قائلاً: "في الأول كنت عايز أعمل الشعبي التجاري السخن اللي فيه صراع ويتابعه الناس على مدار ثلاثين حلقة، وفعلاً نجحت بيه. بس وأنا بتفرج على أعمالي دلوقتي مش برضى عنها بنسبة 80%، حسّيت إن في تكرار في المود وفي الحالة".
وتابع: "وقفت وقلت لنفسي: خلاص، نجحت واتعرفت، روح بقى لأفكار جديدة. أنا مش بخاف من التغيير، عندي ثقة مش غرور، حتى لو التجربة الجديدة ما كسرتش الدنيا، هرجع بعد كده أعمل مسلسل عن الحارة المصرية ويكسرها من تاني".
وردًا على سؤال لميس الحديدي: "ده ثقة ولا غرور؟"، أجاب سامي بابتسامة: "بالعكس، أنا دلوقتي في أكتر مرحلة بمراجِع نفسي وأخطائي، وعايز أكون إنسان أفضل".
وفي جزء آخر من اللقاء، كشف سامي كواليس منشوره الأخير على مواقع التواصل الاجتماعي الذي أعلن فيه عودته بمشروع جديد، قائلاً: "كتبت البوست ردًا على اللي استغلوا قراري بالاعتزال عشان يشمتوا أو يروّجوا شائعات إني اترفدت أو اترفعت عني القضايا، قالوا محمد سامي اتمنع ومطرود بره البلد! وده كلام كدب، فكتبت البوست لأقول إن محدش منعني من حاجة، بالعكس أنا شغال في بلدي وبفخر بيها".
وعن الانتقادات التي طالت مسلسله الأخير "سيد الناس"، أوضح: "الناس كانت بتتكلم عن الصوت العالي، بس اللي بينتقدوا على السوشيال ميديا مش هم جمهور الشارع الحقيقي. عندي مسلسلات صوتها أعلى من سيد الناس، ومع ذلك كسرت الدنيا".
واختتم حديثه مؤكدًا أنه مقبل على مرحلة جديدة من حياته الفنية بروح مختلفة، قائلاً: "أنا قررت أغيّر خلطة شغلي تمامًا، وقدامي اختيار من اتنين: يا أعمل اللي بحبه وأستمتع، يا أرجع لنفس الدوامة اللي كانت بتستنزفني، وعلى جثتي أرجع لنفس الدوامة تاني".
