هاني رمزي يصدم الجماهير: ”إحنا ماشيين بالبركة.. وآخر كرة قدم حقيقية كانت في 2010”
في أعقاب خروج المنتخب المصري من بطولة كأس العرب 2025 بعد الهزيمة الثقيلة أمام الأردن، خرج الكابتن هاني رمزي، لاعب الأهلي ومدرب منتخب مصر السابق، ليطرح رؤية نقدية شديدة اللهجة حول وضع كرة القدم المصرية، مؤكدًا أن الإقصاء لم يكن مفاجئًا بالنسبة له، بل نتيجة طبيعية لسنوات من غياب التخطيط والعمل المؤسسي.
هاني رمزي: "النتيجة متوقعة.. لأن مفيش رؤية"
وأوضح رمزي أن أي منتخب يدخل بطولة دولية يكون أمامه هدف واضح: إما تجهيز عناصر للمستقبل أو السعي لحصد اللقب، إلا أن المنتخب المصري – على حد وصفه – لم ينفذ أي هدف من الاثنين، في ظل غياب استراتيجية طويلة المدى، وافتقاد لمشروع كروي حقيقي.
وقال “إحنا مبنحترمش تاريخ منتخب مصر. المنتخبات اللي حوالينا بتتطور بشكل واضح، وإحنا واقفين مكانّا… نفس الأخطاء، نفس السياسات، نفس التفكير. كل موسم شبه اللي قبله، وكأن محدش عايز يغير حاجة.”
شخصية اللاعب المصري تُهدم… ومفيش هوية
وانتقد رمزي الوضع النفسي والذهني للاعب المصري، مؤكدًا أن الانهيار لا يتعلق فقط بالأداء داخل الملعب، وإنما بفقدان الهوية والشخصية التي عُرفت بها الكرة المصرية لعقود.
وأضاف “اللي بيحصل تدمير لشخصية اللاعب المصري. زمان كان عندنا شخصية قوية في الملعب. النهاردة الموضوع اتغير تمامًا.”
نماذج عربية تُثبت أن التطوير ممكن
وتوقف رمزي عند التجارب العربية الناجحة، مشيرًا إلى منتخبي المغرب وفلسطين كمثالين بارزين على التطور الجاد رغم الظروف.
وقال “بص على فلسطين… رغم الظروف بيقدموا كرة قدم محترمة. فيه تنظيم وفيه روح. إحنا للأسف بنضيع كل حاجة… لا حاضر ولا تاريخ. عشان كده المستقبل غامض.”
وأكد أن أي نجاح تحققه الكرة المصرية في السنوات الأخيرة يكون ثمرة اجتهاد فردي أو «حالة خاصة»، وليس نتاج منظومة تسير وفق خطة مدروسة.
"من 2010 وإحنا ماشيين بالعشوائية"
وأشار رمزي إلى أن آخر فترة قدّم فيها المنتخب المصري كرة قدم تُليق باسمه كانت عام 2010، مؤكدًا أن ما حدث بعد ذلك عبارة عن خطوات متخبطة دون قاعدة صلبة.
وأوضح “إحنا ماشيين بالبركة. مفيش تخطيط، مفيش دراسات، مفيش بناء. عندنا إدارة يوم بيوم. وبعد أسبوع من أي خسارة… بننسى ونرجع لنفس الدائرة.”
الدوري المصري… مشكلة في الجوهر
وتطرق رمزي إلى مستوى الدوري المصري، معتبرًا أنه أصبح منتجًا ضعيفًا مقارنة بالدوريات العربية الأخرى التي شهدت قفزات كبيرة في السنوات الأخيرة.
وقال “اللاعبين بيدخلوا المعسكرات من غير دافع. السفر والمشاركة بقى غاية في حد ذاته. مش شايفين طموح أو رغبة في إعادة اسم مصر.”
"لازم بداية جديدة… وإلا الأمور ستتدهور أكثر"
اختتم رمزي تصريحاته برسالة تحذيرية للمسؤولين:
“لازم وقفة حقيقية وخطة طويلة المدى… مش كلام. اللي حصل كارثة بكل المقاييس. الجمهور مش مصدق، لأن دي مش مصر اللي نعرفها. فقدنا هويتنا… ولازم نبدأ من دلوقتي قبل ما الوضع يبقى أصعب.”