ياسمين رحمي: «الكوميديا أصعب.. والشتايم على السوشيال ميديا ما بتوجعش»
أبدت الفنانة ياسمين رحمي إعجابًا كبيرًا بالدورة الـ46 من مهرجان القاهرة السينمائي الدولي، مؤكدة أن النسخة الحالية قدّمت مستوى غير مسبوق من النضج والتنظيم، وواصلت ترسيخ مكانة المهرجان كأعرق منصة سينمائية في المنطقة، بفضل تنوع الأعمال واختياراته الدقيقة التي تعكس تطور الذائقة الفنية.
وخلال لقائها مع كاميرا البيان نيوز، كشفت ياسمين عن مدى تأثرها الشديد بفيلم «وجع الفراق» للمخرجة الشابة جميلة سامح عبدالعزيز، قائلة:«ده من أكتر الأفلام اللي مستنياها.. ورغم إنّي لسه عرفت امبارح ومكنتش فاضية، قلت لازم أحضر. كنت عايزة أشوف بنت أستاذ سامح وهل ورثت منه الموهبة.. ولما شفت الفيلم اتصدمت! بنت في سنها تعمل عمل بالجمال ده وتخلي القاعة كلها تعيط! بجد كتر خيرها».
وأضافت ياسمين أنها قررت أن تُنهي عامها بحالة من الامتنان، قائلة: «حابّة أودّع السنة بشكر ربنا على كل حاجة حلوة حصلت لي.. وعلى الشغل الجميل اللي قدمته. فخورة إننا كدولة فتحنا المتحف الكبير، أكبر متحف في العالم، ودي خطوة تخليني فخورة جداً ببلدي. أتمنى إن أعمالي الجاية تحقق نجاح كبير وأفضل مستمرة في خطوات أحسن».
وتطرقت ياسمين لأغرب التعليقات التي جاءت على مواقع التواصل الاجتماعي بعد مشاركتها في مسلسل «ما تراه ليس كما يبدو»، حيث قدمت شخصية شريرة:
«كل التعليقات كانت شتايم للكاركتر! الناس دمجت الدور مع شخصيتي الحقيقيّة، وده كان من أغرب اللي شوفتُه».
وعن تفضيلها بين الكوميديا والتراجيديا، أوضحت:
«بلعب الاتنين.. بس الكوميدي أصعب بكتير، ومش أي حد يعرف يضحّك حد، وعشان كده بحبه أكتر».
واختتمت ياسمين حديثها بتعليق صريح حول التحرش الإلكتروني:
«طبعًا بيجيلي كومنتات مش محترمة.. وبتجاهلها. الممثلات دايمًا متعرضين للناس أكتر، وده بيدي للبعض إحساس إن من حقه يشتم أو يتكلم في حياتنا. في نوعية من الجمهور بتعمل كده بس علشان تلفت النظر.. وأنا ما بديش التفاهات دي أي قيمة».
