أسرار الكواليس تتكشف.. مريم الخشت تروي أصعب لحظاتها في «بنات الباشا»
خطفت الفنانة مريم الخشت الأضواء خلال حضورها العرض الخاص لفيلم «بنات الباشا» في مهرجان القاهرة السينمائي، حيث تحدثت لـ«البيان نيوز» عن تجربتها مع العمل، مؤكدة أن ارتباطها بالروايات المحوّلة إلى أفلام كان سببًا رئيسيًا في حماسها للمشاركة.
وقالت مريم: «أنا من عشاق الأفلام اللي مبنية على روايات.. لأنها بتجمع جمهور مختلف؛ جمهور السينما وجمهور القراءة، وحتى اللي مش بيروح سينما عادة بيروح يشوف الفيلم. الرواية الأصلية حلوة جدًا، وشخصية نادية الّي بقدمها كانت أكتر شخصية تعلقت بيها وأنا بقرا.. ومبسوطة إني بلعبها، رغم إنها مش شبهي غير في حاجات بسيطة».
وكشفت أن شخصيتي «نادية» و«شيرين» داخل العمل لا تربطهما أي صلة، قائلة: «الشخصيتين مالهمش علاقة ببعض خالص.. بعاد جدًا سواء في التفكير أو التفاصيل. الفيلم خلصنا تصويره من سنة، من أكتوبر اللي قبل اللي فات».
وتحدثت عن كواليس التصوير مؤكدة أن المكان لم يكن العامل المؤثر الأكبر كما يعتقد البعض:
«اللوكيشن نفسه ملوش تأثير كبير على علاقتنا كممثلين.. صحيح صالون الباشا هو المكان المحوري، لكن كان في مشاهد تانية كتير احتكينا فيها ببعض. العمل ده عرفني على ممثلين أول مرة أشتغل معاهم وكسبتهم فعلًا.. الكواليس جمعتنا».
وعن أصعب اللحظات، قالت مريم:
«أول مشهد ليا في الفيلم… أول ظهور لنادية، كان من أصعب المشاهد بالنسبة لي. مش هقدر أحرق، بس هتفهموا أول ما تشوفوا الفيلم».
ولم تخفِ مريم موجة الرسائل الغريبة التي تلقتها من الجمهور بسبب ظهورها مع الفنان محمد فراج في الكواليس، متابعة بابتسامة:«الناس كلها بتقولي… إنتي كويسة؟ إحنا خايفين عليكي من فراج! يا جماعة والله هو ممثل مش طبيعي… أنا دايمًا بقول إن ده مش بني آدم زينا، ده ممثل خارق، طالع له جسم لوحده من كتر ما هو بيعيش الدور».