“النصيب اختار”.. أروى جودة تكشف تفاصيل زواجها من أجنبي بطباع مصرية
في تصريح مفاجئ ومليء بالرومانسية، كشفت النجمة أروى جودة عن تفاصيل استعدادها للزواج من زوجها الأجنبي، مؤكدة أنها ستحتفل بزفافها مرتين، الأولى في إيطاليا بشكل عائلي بسيط، والثانية في مصر وسط الأهل والأصدقاء.
وقالت أروى خلال لقائها في برنامج "أون سيت" المذاع عبر قناة ON:"عمري ما كنت متخيلة إني هتجوز حد أجنبي، كنت دايمًا شايفة نفسي مع شخص مصري أو عربي، بس النصيب بيختار من غير ما نستأذنه. هنحتفل بفرح صغير في إيطاليا للعيلة، وبإذن الله الفرح الكبير والزقططة كلها هتبقى في مصر، وجهزت فستانين مخصوص"
وتحدثت النجمة عن شخصية زوجها التي أسرتها منذ اللحظة الأولى قائلة: "هو إيطالي فرنساوي، لكن بصراحة طباعه مصرية جدًا.. بيحب العيلة، بيحترم الكبير، ودمه خفيف زي المصريين. طول عمري بحلم بالاستقرار، لكن مكنتش لاقية الشخص اللي أحس إني ممكن أكمل معاه، لحد ما قابلته."
كما أوضحت أروى أنها لم تكن تنوي الابتعاد عن الارتباط برجل مصري، بل كانت تبحث عن التفاهم والانسجام أكثر من الجنسية: "مكنتش بحاول أبعد عن الرجالة المصريين، بس كنت بدور على حد يفهمني وأفهمه، ويبقى بينا طباع مشتركة، أنا بحترم الغيرة في العلاقة زي ما هو لازم يحترم مشاعري برضه."