صرخة فنية من منال سلامة: «رجّعوا هيبة الدراما.. مش كل من عنده متابعين يبقى نجم»
في حوار صريح ومليء بالمفاجآت، كشفت الفنانة منال سلامة الكثير من الأسرار حول ابنتها أميرة أديب، وشقيقها شريف سلامة، وأزمة البطالة التي تضرب الوسط الفني، مؤكدة أن السوشيال ميديا أصبحت «لعنة» تهدد الفن الحقيقي.
وفي لقاء خاص مع الإعلامية شيرين سليمان ببرنامج «سبوت لايت» على قناة صدى البلد، تحدثت منال عن الهجوم المستمر على ابنتها أميرة، قائلة: «أميرة بتتحاسب على مشاريب عيلة أديب، الناس بقت بلا قلب، بينتقدوها ظلم رغم إنها بنت موهوبة ومكافحة، ما حدش ساعدها تدخل الفن، بالعكس أنا كنت ضد دخولها المجال ده من الأساس».
وأضافت موضحة: «أنا كنت بتمنى لها حياة هادية، تكون زوجة وأم بعيد عن التوتر اللي في الفن. بس هي عندها شغف وموهبة حقيقية. أميرة عندها ADHD وده خلاها مبدعة ومتعددة المواهب.. بتمثل، بترسم، بترقص، وبتعزف موسيقى».
وأكدت منال أن ابنتها ما زالت في مرحلة اكتشاف الذات، قائلة: «هي دايمًا بتقول إنها هتفضل تجرب لحد ما توصل لللي هي عايزاه.. الجيل ده أذكى مننا بكتير وعنده وعي وجرأة».
وفي جزء آخر من اللقاء، فتحت منال سلامة ملف دخول شقيقها شريف سلامة إلى عالم التمثيل، قائلة: «شريف في البداية كان عايز يبقى مدير تصوير، وقدم في معهد السينما قسم تصوير لكن ما اتقبلش.. كان زعلان جدًا، وساعتها جوزي المخرج عادل أديب هو اللي شجّعه يدخل قسم تمثيل، وقاله: جرب، يمكن تحبها.. وبالفعل حب اللعبة، وربنا كرمه».
وعن علاقتهما الأخوية، أكدت: «أنا وشريف اتربينا في بيت كله حب واحترام، بنأكل على طبلية واحدة، وده خلانا قريبين جدًا من بعض. هو برج السرطان هادي وحنون وأنا برج الحمل نارية شوية، بس إحنا شبه بعض في حب النظام والنظافة».
أما عن حال الفن الآن، فعبّرت منال عن استيائها من الفوضى التي أصابت الوسط الفني، قائلة: «دلوقتي بقى فيه بطالة فنية بسبب تكدس الخريجين من المعهد ودخول البلوجرز في المجال، المعهد كان بيختار 18 طالب من آلاف، النهاردة بقى بيخرج مئات سنويًا.. منين هيشتغلوا كلهم؟».
وأضافت بحدة: «البلوجرز خربوا المهنة! المقياس بقى بعدد المتابعين مش بالموهبة، اللي دمه خفيف على السوشيال ميديا مش شرط يعرف يمثل قدام الكاميرا 40 دقيقة، فيه فرق كبير بين فيديو دقيقتين وتمثيل حقيقي».
واستعادت منال ذكريات أعمالها القوية، مشيرة إلى مسلسل «قاسم أمين» الذي جسدت فيه شخصية الأميرة نازلي، ووصفت الدور بأنه من أهم ما قدمت، قائلة: «تعبت جدًا في المسلسل ده، الشخصية كانت قوية ومثقفة وبتناقش كبار المفكرين.. بس للأسف أعمال زي دي مش بتتعرض، بينما (لن أعيش في جلباب أبي) بيتعاد لحد دلوقتي».
وروت موقفًا طريفًا: «كنت في لبنان وشوفت المسلسل شغال في محل، والبنت اللي شغالة صرخت وقالت: نوفا! ممكن نتصور؟ اتفاجئت إن المسلسل لسه مؤثر بعد السنين دي».
واختتمت منال سلامة حديثها بكلمات صادقة: «الفن كان زمان مدرسة حقيقية، النهارده بقى ساحة مفتوحة لكل من يملك موبايل ومتابعين نفسي نرجع نحترم الموهبة ونصدق إن الفن رسالة مش تريند».