باسم يوسف: فقدت أهليتي كطبيب.. وبقالي 15 سنة ما لمستش عيان لمصلحتهم
حل الإعلامي الساخر باسم يوسف ضيفًا على برنامج "كلمة أخيرة" مع الإعلامي أحمد سالم على قناة ON، حيث تحدث بصراحة عن مسيرته المهنية، وحياته بعد الغياب، وكشف العديد من الأسرار والمواقف الطريفة.
واستهل يوسف اللقاء معربًا عن سعادته بالعودة إلى الشاشة المصرية من خلال القناة التي شهدت بدايته الأولى عام 2011. وخلال الحوار، مازحه أحمد سالم قائلاً: "اتفقنا هتقولي أستاذ وأنا أقولك يا دكتور، رغم إن علاقتك بالطب مش زي الأول". ليرد باسم ضاحكًا:"أنا فقدت الحق إن حد يقولي يا دكتور.. بقالي 15 سنة ما حطتش إيدي على عيان، وده لمصلحتهم، لأن خلاص فقدت الأهلية من زمان جدًا".
وتحدث باسم يوسف عن الشائعات التي تطارده مع كل ظهور إعلامي، مؤكدًا أنها وصلت إلى حد تهديد استقرار حياته الزوجية، قائلاً بسخرية: "كل مرة أطلع في برنامج يقولوا إني أخدت فلوس كتير.. بيقولوا 22 مليون جنيه، وأنا بقول الحقيقة إنهم 22 مليون دولار! مراتي بقت تشك فيا، بتسألني: الفلوس دي فين؟ فاتح بيت تاني ولا إيه؟".
وأضاف ممازحًا:"أنا مستعد أقدم أفلام، حفلات، طهور، أو حتى إعلانات.. أي حاجة على حسب السعر!".
وعن سبب ارتباط اسمه الدائم بالجدل، قال يوسف: "مش عارف ليه دايمًا اسمي بيعمل دوشة.. أنا شايف نفسي واحد عادي، يمكن محظوظ أكتر مما أستحق. أنا الراجل الغلط في المكان الغلط، بحب الكوميديا لكن لقيت نفسي غارق في السياسة، وده مبرجلني جدًا".
واستعاد ذكرياته قائلاً: "الشباب الجديد مش فاهم كل الضجة دي عني.. بيقولوا مين عمو اللي طالع على التلفزيون ده؟"، مشيرًا إلى أن الجمهور اليوم يبحث عن الترفيه أكثر من أي وقت مضى.
واختتم قائلاً: "الناس مستعدة تدفع فلوس علشان اللي بيسليها مش اللي بتحتاجه.. حتى الدكاترة والفنانين في الآخر سلع.. الفرق إن الناس بتروح للي يخليها مبسوطة".